大学站的车站历史

大学站列车出轨事故

1988年6月4号下昼两点，一列九广铁路（英段）南行货运列车喺大学站以北嘅白石角出轨，直到第二日朝早10点40分恢复服务。期间九铁服务中断咗成日。九铁方面派出接驳巴士疏导乘客，但场面混乱。例如喺沙田站，夜晚大批乘客争先恐後上接驳巴士，有人甚至爬窗上车。出事嗰段铁路本来系个急弯，後来喺1995年拉直。而家系香港教育学院运动场。

车站命名

大学站之前叫马料水站，喺1956年9月24号正式启用。车站启用初期每日只有南北行各三班列车停站。随住香港中文大学落成，喺1966年12月11号宣布改名做大学站。

2007年12月2号两铁合并，东铁线现有大学站，同起紧嘅港铁西港岛线香港大学站，站名重复。当其时港铁未就此事有所定案。有类似情况嘅旺角站，九广东铁旺角站就改名做东铁线旺角东站。有舆论认为依传统地名，东铁线原有嘅大学站应恢复原名马料水站，新起嘅大学站就命名石塘咀站，但港铁发言人指西港岛线大学站重未正式命名，并重申名称将会反映该区嘅地区特色。2009年，西港岛线动工起之後，港铁将西港岛线大学站正式改做香港大学站；不过由於重喺兴建阶段，因此正式名称仍然有变数；而家嘅大学站亦有可能喺西港岛线通车後顺便改名做中文大学站。